Pienso qu´el monologuismu cómicu asturianu ye un xéneru mui ricu, que tien una bayura de testos impresionante, con munches posibilidaes espresives y artístiques, perorixinal, que ta nel subconsciente coleutivo de los asturianos por ser una práutica escénica ancestral, y que, convenientemente trabayao, puede dar frutos mui rellumosos a la cultura asturiana.

Esto nun lo tengo pensao "a priori", sinon que ye una conclusión a la que fui aportando col pasu del tiempu. Dende qu´entamé a cuntar cuentos pa adultos, allá per Madrid hai unos diez años, vínoseme a la memoria la figura del monologuista, esa cola que tanto riía de neñu y que dempués fo, a xuiciu de dalgunos, dexenerando y decayendo. Pensaba yo: "Esto de contar cuentos ta mui bien, pero´l monologuista amesta a la hestoria el versu, un personaxe y una coña inconfundible". Entrugué a tolos compañeros de profesión qu´atopé si nes sos tierres había figures comparables a la del monologuista. La rempuesta foi siempre que non, que si´l xuglar, el trovador... pero nada tan orixinal como´l monologuista. Entrugué tamien en Santiago de Cuba, nel so festival de "oralidad", a cubanos, colombianos, arxentinos, estaunidenses, mexicanos... Delles tradiciones parecíense (el cuenteru en Colombia, el Ño Bomba nel oriente de Cuba, el payador), pero lo de cuntar hestorias cómiques en versu faciendo un personaxe d´aldeanu, eso ye propiu d´Asturies.

            Nel mundu actual tien cada vez mas importancia la formación. Pal arte tamién. Toi convencíu de que llegará un momentu nel que les formes populares de teatru y narración s´han enseñar como una asignatura más nes escueles d´arte dramático. Mentanto, y si les mios informaciones nun me fallan, en Candás va impartise el primer Taller de Monologuismu Cómicu Asturianu de la hestoria (y perdoname pol grandonismu). N´él deprenderemos cómo facer un personaxe, cómo analizar los testos (esti añu tenemos la suerte de que la editorial Trabe ta asoleyando una coleición de monólogos), cómo trabayar el cuerpu y la voz y, por supuesto, fadremos práutiques. Tamién-y doi muncha importancia a lo que guei se llama "oralidad", a la recopilación de hestories y socedíos, pero non solo cola intención d´espublizalos, sinón col enfotu de contalos, de trabayalos, de usalos pa facer hestories pal públicu.

Nel mes de marzu pasáu fui invitau a les "I Jornadas de reflexión sobre la narración oral", celebraes en Madrid, pa facer una ponencia sobre´l mio trabayu col monologuismu cómicu asturianu, col titulu de "L´usu d´elementos tradicionales pa crear hestories modernes". Los actores y cuentacuentos de Madrid, Arxentina, Camerún, Zamora o Barcelona que participaben nestes xornaes ablucaron cuando y-os despliqué en qué consiste el monologuismu asturianu, el so calter intermediu ente´l teatru y la narración o cuentacuentos, la posibilidá de facer un personaxe y de usalo tamién pa comentar la actualidad y pa modernizar el xéneru... pero ablucaron más cuando y-os comenté la poca importancia que, salvo esceiciones, los mesmos asturianos-y damos. Unos díes dempués Alain Fernández llamóme pa proponeme´l cursu.             Aceuté comencíu de que si trabayamos con ganes, con simpatía, con enfotu, podemos algamar un surdimientu del monologuismu cómicu. Condiciones y talentu pa ello hailes.

Carlos Alba, Cellero